GOD BESKERM

<p>Esra en die groot groep mense wat hom vergesel het<br>
na Jerusalem het geen soldate gehad om hulle op die<br>
lang reis te beskerm nie.</p>
<p>Daar was uiters kosbare skatte by hulle wat vir die tempel<br>
bedoel was. Goud, silwer en kosbare gereedskap. Langs<br>
hierdie hoofroete was baie rowers wat gereeld die reisigers<br>
beroof het. Dit het Esra bekommerd gemaak. Ons is ook<br>
dikwels bekommerd wanneer ons ‘n bepaalde reis moet<br>
aanpak. Ons ken hierdie onsekerheid. Wat doen Esra in sy<br>
omstandighede?  Esra 8:21: “Ek het daar by die Ahawarivier<br>
‘n vasdag uitgeroep om ons voor ons God te verootmoedig...”<br>
Voordat hy en sy mense vertrek het, het hy ‘n dag van vas en<br>
gebed uitgeroep. Hulle wou doelbewus die Here hierin vra om<br>
hulle te beskerm. Hulle wou doelbewus hul afhanklikheid van<br>
God bely. Hulle het hulle doelbewus voor God verootmoedig.</p>
<p>Esra weet dat God alleen hulle uiteindelik kan beskerm.<br>
Daarom gaan vra hy dit! Hy beklemtoon hulle vertroue op<br>
God alleen om hulle te beskerm. Hulle is selfs bereid om later<br>
te vertrek, en seker te wees God reis saam. God was inderdaad<br>
getrou. Hy het sy beskerming aan Esra en sy groep gebied en<br>
hulle veilig tot in Jerusalem gelei.</p>
<p>Ons kan Esra se voorbeeld volg. Gaan vra God om jou te beskerm.<br>
Dit vra gebed en verootmoediging. Skuil by God. In Vers 31 staan<br>
daar: “Ons God het sy hand oor ons gehou...” God hou ‘n hele<br>
skare mense in sy hand. Lees gerus verse 1-14 daaroor.</p>
<p>God hou vandag nog die veiligste hand in die heelal oor ons.<br>
In Johannes 10:28-30 vertel Jesus dat as jy eenmaal in God se<br>
hand is, Hy jou nooit daaruit laat val of ruk nie. Niks kan jou uit<br>
sy hand ruk nie! Niks nie! Dit is die veiligste plek in die ganse heelal.<br>
Daar is plek vir al Jesus se volgelinge in God se hand. God se hand<br>
raak nie vol of oorvol nie. En God kén elkeen wat Hy in sy hand hou<br>
op sy naam. Maak soos Esra:<br>
Plaas jouself met gebed en verootmoediging in God se hand.<br>
Hy beskerm jou. Hy versorg jou. Vertrou Hom!</p>
<p>Ernest</p>