WAT IS DIE WAARHEID?

<p>Wat is die waarheid?<br>
In Bybelse terme is die vraag eerder: “Wie is die waarheid?”<br>
Jesus Christus was nie die enigste groot geestelike leier wat<br>
op aarde geleef het nie. Dink maar aan Boeddha. Miljoene<br>
mense het hom aangehang, en doen dit vandag nog. Aan die<br>
einde van sy lewe kon hy slegs sê: “My leringe wys die weg<br>
aan om die waarheid te vind.” Ook die profeet Mohammed<br>
se aanhangers tel deur die eeue en vandag nog in die miljoene.<br>
Hy het gesê: “Die waarheid is aan my geopenbaar.” Die wyse<br>
mense van die wêreld stem saam dat daar maar één waarheid is,<br>
maar hulle praat op verskillende maniere daaroor.</p>
<p>Jesus Christus het nie net oor die waarheid gepraat nie. Hy het nie<br>
maar net saam met ander wyses daarna gesoek nie...<br>
Hy is die Waarheid, met ‘n hoofletter, in die diepste sin van die woord.<br>
Kort voordat Hy vir die verlossing van mense aan die kruis sou sterf,<br>
het Hy in Johannes 14:6 gesê: “Ek is die weg en die waarheid en die lewe.”</p>
<p>Die Christelike geloof is nie gegrond op ‘n stelsel van geestelike waardes<br>
nie, ook nie op geestelike wette en voorskrifte nie. Dit is inderdaad uniek<br>
omdat dit gegrond is op en in ‘n Persoon! Jesus Christus die Here!<br>
Om die Christelike geloof te bely beteken nie om ‘n aantal geestelike<br>
waarhede aan te hang nie. Dit is om kennis te hê van dié Waarheid,<br>
Hóm in geloof te bely as Verlosser en Here, en in lewende verhouding<br>
met Hom te leef. Dit is nie bloot om ‘n ideaal na te jaag soos “om hemel<br>
toe te gaan nie”. Dit is om in dankbaarheid en blydskap te leef oor die<br>
werklikheid van jou verlossing in Hom!</p>
<p>Dit alles is slegs moontlik omdat Jesus self ook God is, ja, die eniggebore<br>
Seun van God! Alles wat ons dink, alles wat ons hoop, alles wat ons leef,<br>
is nou gegrond in Hom as Persoon. Hy is ons Here en ons God. Dit is die<br>
een sentrale ware hoop vir die mens! Die middelpunt van die evangelie<br>
boodskap is ‘n Persoon wat na hierdie wêreld toe gekom het, en nie<br>
allerhande geestelike wette en voorskrifte wat ons moet uitleef nie.<br>
Is jy in ‘n lewende verhouding met hierdie Persoon,<br>
omdat jy Hom bely, en jou verhouding met Hom uitleef, naamlik dat<br>
Hý jou Here en God is?</p>
<p>Ernest</p>